Алматы қаласы бойынша Мемлекеттік кірістер департаменті Алматы қаласы Медеу ауданы әкімдігімен және аудандық мемлекеттік органдармен бірлесіп ұйымдастырылған мемлекеттік қызметтер жәрмеңкесіне белсенді түрде қатысты.

Іс-шараның мақсаты – халықтың мемлекеттік қызметтерді алу тәртібі туралы хабардарлығын арттыру, цифрландыру саласындағы жаңашылдықтарды түсіндіру және азаматтардың мемлекеттік органдармен өзара іс-қимыл жасау рәсімдерін жеңілдету болып табылады.

Жәрмеңке барысында 45-тен астам азамат консультация алды. Азаматтар тарапынан ерекше қызығушылық Жаңа Салық кодексіне, атап айтқанда, 2026 жылдан бастап күшіне енетін оңайлатылған декларация негізіндегі жаңа арнайы салық режиміне, сондай-ақ оны қолдану тәртібі мен есептілікті ұсыну мәселелеріне қатысты болды.

Іс-шара тұрғындарға өзекті мәселелер бойынша түсініктемелер алуға, салықтық сауаттылығын арттыруға және мемлекеттік қызметтерді электрондық форматта алу тәртібімен танысуға мүмкіндік берді.